Негізгі - Жаңалықтар

Жамбылдық дзюдошылар іріктеу кезеңінде жеңіске жетті

09:15 | 31 қазан 2016

Тараз қаласында Конфедерация Кубогының D тобындағы іріктеу кезеңі аяқталды. Жамбыл, Маңғыстау, Атырау және Ақтөбе облысының құрамалары грек- рим және еркін күрес, дзюдо, таеквондодан үздіктерді анықтады. Бұл туралы Конфедерацияның баспасөз қызметі мәлімдейді.

Жамбылдық дзюдошылар финалдық кезеңге жолдама алды. Олар үш жекпе-жегін жеңіспен аяқтады. Бірінші кездесуінде жамбылдықтар ақтөбелік дзюдошылардан 4:1 нәтижесімен басым түссе, екінші белдесуде дәл осындай есеппен Маңғыстау құрамсын жеңді. Осыдан кейін татами иелері атыраулық спортшыларды 5:0 тізе бүктірді.

Таеквондо жарысынан топтық іріктеу кезеңінің жеңімпазы – Жамбыл облысы. Жарыс қожайындары алдымен ақтөбелік қарсыластарын 81:57 есебімен, содан кейін Атырау құрамасын 93:75 нәтижесімен жеңді. Айта кетейік, Жамбыл құрамасы сапында Рио Олимпиадасына қатысушы Руслан Жапаров өнер көрсетті.

Грек-рим күресінен де жеңімпаз команда белгілі болды. Үш кездесуінде жеңіске жеткен жамбылдық палуандарға тең келер ешкім болмады. Жамбыл құрамасы Ақтөбе, Атырау, Маңғыстау құрамаларына қарсы болған үш кездесуін 5:1 есебімен аяқтады.
Ал еркін күрес жарысында Ақтөбе құрамасы мықты деп танылды. Маңғыстаулық палуандар екінші, боз кілем иелері үшінші сатыда.
Конфедерация Кубогының финалдық кезеңі желтоқсанның 3-4 күндері Алматыдағы Балуан Шолақ атындағы спорт сарайында өтеді. Жарыстың жалпы жүлде қоры 125 миллион теңгені құрайды.
Айта кетейік, Конфедерация Кубогы Тимур Құлыбаевтың бастамасымен қола алынған тың жоба.

0 пікірлер

Арқылы авторизация жасай аласыз:

Әлеуметтік желідегі парақшалар