Қазақстан құрамасы аралас командалық сында алғаш рет Әлем чемпионатының финалына шықты
Дзюдодан Қазақстан құрамасы Эквадорда өтіп жатқан жасөспірімдер арасындағы Әлем чемпионатында аралас командалық сында алғаш рет финалға жолдама алды.
Жартылай финалда Қазақстан құрамасы Өзбекстан командасын 4:2 есебімен жеңді.
Жартылай финалда ел намысын Зере Талғатқызы (-48 кг), Расулхан Ғабит (-60 кг), Азима Серік (-63 кг), Әлижан Сайлаубеков (-81 кг), Тоғжан Төлебай (+63 кг) және Әділжан Жаудинов (+81 кг) қорғады.
Финалға дейін қазақстандық дзюдошылар алдымен Болгария құрамасынан (4-1) басым түсіп, ширек финалда Жапонияны (4-2) жарыс жолынан шығарды. Ал жартылай финалда Өзбекстан (4-2) құрамасын жеңіп, шешуші кезеңге өтті.
Финалда Қазақстан құрамасы Бразилия спортшыларымен кездеседі.
Шешуші белдесу Астана уақытымен сағат 03:00-де басталады.
Айта кетейік, бұған дейін Қазақстан құрамасы жасөспірімдер арасындағы Әлем чемпионатының аралас командалық жарысында финалға шықпаған.
Еске сала кетейік, Қазақстан құрамасы Әлем чемпионатының жекелей жарыстарын 3 алтын, 3 күміс және 4 қола жүлдемен - барлығы 10 медальмен аяқтап, жалпы медаль кестесінде екінші орынға тұрақтады.
Қазақстан дзюдо федерациясының баспасөз қызметі
0 пікірлер